கருந்துளைகள் பிரபஞ்சத்தின் விசித்திரமான விஷயங்களில் ஒன்றாகும். இது விண்வெளியில் வேகமாக நகரும் துகள்கள் கூட தப்பிக்க முடியாத அளவுக்கு தீவிரமான ஈர்ப்புச் சக்தியைக் கொண்ட ஒரு இடமாகும். இவ்விடத்தில் ஒளியால் கூட தப்பிக்க முடியாது, எனவே இதற்கு ‘கருந்துளை’ என்று பெயரிட்டுள்ளனர்.
ஒரு ஜெர்மன் இயற்பியலாளரும், வானியலாளருமான கார்ல் ஸ்வார்ஸ்சைல்ட் (Karl Schwarzschild) 1915 ஆம் ஆண்டில் ஐன்ஸ்டீனின் பொது சார்பியல் கோட்பாடுகளுக்கு சரியான தீர்வைக் கண்டுபிடித்த பின்னர் கருந்துளையின் நவீன பதிப்பை முன்மொழிந்தார்.
ஒரு மிகப்பெரிய விஷயத்தையும் முடிவற்ற சிறிய புள்ளியாகக் நெருக்கிவிட முடியும் என்பதை ஸ்வார்ஸ்சைல்ட் உணர்ந்தார். இது விண்வெளியின் நேரத்தைக் கூட வளைக்கும் அளவுக்கு ஈர்ப்பு சக்தியைக் கொண்டிருக்கும், அதனால் ஒளியில் அதிகமாக காணப்படும் ஃபோட்டான்கள் கூட அதன் வளைவில் இருந்து தப்ப முடியாது.
சூரியனின் நிறை எண்ணற்ற சிறிய புள்ளிகளாக நெருக்கப்பட்டால், அது 3 கிலோமீட்டருக்கும் குறைவான (சுமார் 2 மைல்) ஆரம் கொண்ட கருந்துளை உருவாகும். இதேபோல், பூமி ஒரு சிறு புள்ளியின் அளவுக்கு நெருக்கப்பட்டால் அந்த புள்ளி ஒரு சில மில்லிமீட்டர்களாகவே இருக்கும். இந்த கருந்துளை ஒரு சிறிய கோலியை விட பெரியதாக இருக்காது.
கருந்துளைகளின் மிகவும் பொதுவான வகைகள் நட்சத்திர-நிறை (Stellar-Mass) கருந்துளை மற்றும் மீப்பெரும் (Supermassive) கருந்துளை ஆகும். பாரிய நட்சத்திரங்கள் வெடிக்கும் போது நட்சத்திர-நிறை கருந்துளைகள் உருவாக்கப்படுகின்றன. இது ஒரு சில சூரியன்களின் நிறையைக் கொண்டிருக்கும். விண்மீன் திரள்களின் மையத்தில் காணப்படும் மீப்பெரும் கருந்துளைகள் பொதுவாக மில்லியன் கணக்கான சூரியன்களுக்கு சமமான நிறையைக் கொண்டிருக்கும்.
பிரபலமான கருந்துளைகள்
சிக்னஸ் எக்ஸ்-1: இது ஒரு நட்சத்திர-நிறை கருந்துளை ஆகும். சுமார் 6,500 ஒளி ஆண்டுகள் தொலைவில் உள்ள இந்த கருந்துளை எக்ஸ்ரே கதிர்களை வெளியிடுகின்றது. இது ஒரு மிகப்பெரிய நீல நிறமான நட்சத்திரத்தால் உருவான ஒரு கருந்துளை என்று கருதப்படுகிறது.
சாகிட்டாரியஸ் A*: பால்வெளி அண்டத்தின் மையத்திலுள்ள மீப்பெரும் கருந்துளை. இது தனுசு நட்சத்திரக் கூட்டம் காணப்படும் திசையில் அமைந்துள்ளது. இந்த கருந்துளை சுமார் 4 மில்லியன் சூரியன்களைக் கொண்டுள்ளது.
M87: இந்த நீள்வட்ட அண்டம் சுமார் 3.5 பில்லியன் சூரிய மீப்பெரும் கருந்துளைகளைக் கொண்டுள்ளது. இந்த கருந்துளை அதிவெப்பமான ஒரு வட்டுடன் சூழப்பட்டுள்ளது மற்றும் அண்டத்தின் மையத்திலிருந்து 5,000 ஒளி ஆண்டுகள் வரை இந்த கருந்துளையிலிருந்து விலகிச் செல்லும் வெப்பம் பரவியிருக்கின்றது.
செண்டாரஸ் A: சென்டாரஸ் நட்சத்திரக் கூட்டத்தின் திசையில் அமைந்துள்ள இந்த அண்டம், இயங்கிக் கொண்டிருக்கும் ஒரு கருவுடன் கூடிய நம்பமுடியாதளவு பெரிய சுழல் விண்மீன் ஆகும். இது அதன் மையத்தில் 55 மில்லியன் நட்சத்திர-நிறை கருந்துளைகளைக் கொண்டுள்ளது. இது விண்மீன் மண்டலத்திலிருந்து ஒரு மில்லியன் ஒளி ஆண்டுகள் இடைவெளியில் ஒளியின் பாதி வேகத்தில் நகர்ந்து கொண்டிருக்கின்றது.
கருந்துளைகள் பற்றிய சில தகவல்கள்
- கருந்துளையின் பாரிய ஈர்ப்புச் சக்தி அதன் அருகிலுள்ள இடத்தையும் நேரத்தையும் சிதைக்கிறது. நீங்கள் ஒரு கருந்துளைக்கு அருகில் செல்லும் போது அவ்விடத்தில் நேரம் மெதுவாகவே இயங்கும். கருந்துளைக்கு மிக அருகில் இருக்கும் பொருள் ஒருபோதும் தப்ப முடியாது.
- ஒரு கருந்துளைக்குள் நுழையும் பொருட்கள் உதாரணமாக வாயு, தூசி, நட்சத்திரங்கள் மற்றும் கிரகங்கள் கருந்துளையைச் சுற்றி அக்ரிஷன் எனப்படும் வட்டு வழியாக சுற்றி வரும்.
- ஒரு கருந்துளையைச் சுற்றியுள்ள “திரும்பப் முடியாத புள்ளி” நிகழ்வு அடிவானம் என்று அழைக்கப்படுகிறது. கருந்துளையின் ஈர்ப்பு அதைச் சுற்றியுள்ள வட்டில் சுழலும் பொருளின் வேகத்தை கடக்கும் பகுதி இதுவாகும். நிகழ்வு அடிவானத்தை ஏதேனும் கடந்துவிட்டால், அது கருந்துளையின் ஈர்ப்புச் சக்தியிலிருந்து இழக்கப்படுகிறது.
- முதன்முதலில் 18 ஆம் நூற்றாண்டில் கருந்துளைகள் இருப்பதாக முன்மொழியப்பட்டன. ஆனால், 1964 ஆம் ஆண்டில் முதல் கருந்துளை கண்டுபிடிக்கப்படும் வரை இது ஒரு கணிதமாகவே இருந்தது. இந்த முதல் கருந்துளை சிக்னஸ் நட்சத்திர தொகுப்பில் உள்ள எக்ஸ்ரே மூலமான சிக்னஸ் எக்ஸ் -1 என்பதாகும்.
- கருந்துளைகள் கதிர்வீச்சைத் தாங்களாகவே வெளியிடுவதில்லை. அக்ரிஷன் வட்டில் பொருள் சூடேற்றப்படுவதால் வெளியிடப்படும் கதிர்வீச்சினால் அவை கண்டறியப்படுகின்றன. மேலும், அருகிலுள்ள பிற பொருட்களின் மீது கருந்துளையின் ஈர்ப்பு விளைவால் அவை கண்டறியப்படுகின்றன.
