புதிதாக கண்டுபிடிக்கப்பட்டுள்ள அரிய வகை “நடக்கும் சுறா மீன்!”

ஒரு 12 ஆண்டு ஆராய்ச்சி முயற்சியில், சர்வதேச விஞ்ஞானிகள் குழு நான்கு வகையான ‘நடக்கும் சுறாக்களை’ கண்டுபிடித்துள்ளது. இந்த கண்டுபிடிப்புடன் அரிய விலங்குகளின் அறியப்பட்ட இனங்களின் எண்ணிக்கை கிட்டத்தட்ட இரட்டிப்பாகுகிறது.

ஒரு கடற்கரையில் உங்களைத் துரத்தும் சுறாவின் உருவம் இப்போது உங்கள் மனதில் தோன்றியிருக்கலாம். ஆனால், இந்த புதிய விலங்கின் உடலியல் எவ்வாறு செயல்படுகிறது என்பதைக் கொண்டு இது மனிதருக்கு ஆபத்து ஏற்படுத்தாத சுறா மீன் எனக் கண்டறியப்பட்டுள்ளது. இது வடக்கு ஆஸ்திரேலியாவிற்கும் நியூ கினியாவிற்கும் இடையிலான வெப்பமண்டல நீரில் வாழ்கிறது.

ஆஸ்திரேலியாவின் குயின்ஸ்லாந்து பல்கலைக்கழகத்தைச் சேர்ந்த உயிரியலாளர் கிறிஸ்டின் டட்ஜியன் கூறுகையில், “சராசரியாக ஒரு மீட்டர் [3.3 அடி] நீளத்திற்கு வளரும் இந்த நடக்கும் சுறாக்களால் மக்களுக்கு எந்தவித அச்சுறுத்தலும் இல்லை.

“ஆனால், குறைந்த ஆக்ஸிஜன் கொண்ட சூழல்களில் வாழும் இவை சிறிய ஓட்டுமீன்கள் மற்றும் மெல்லுடலிகள் எனப்படும் சிறிய மீன்களை இரையாக உட்கொள்கிறது. இவ்வாறான இரையை தேடி உட்கொள்வதற்காகவே அவை துடுப்புகளின் மூலம் நடக்கும் திறனைப் பெற்றுள்ளது” என்கிறார்.

கண்டுபிடிக்கப்பட்டுள்ள இந்த நான்கு புதிய சுறா இனங்களும் ஹெமிசிலியம் (Hemiscyllium) என்ற இனத்தைச் சேர்ந்தவை. இந்த புதிய சுறாக்கள் மரபணு பகுப்பாய்வுகளின் மூலம் ஏற்கனவே இருக்கும் ஐந்து வகையான சுறாக்களுடன் இணைக்கப்பட்டுள்ளது. இதனை ஆய்வின் போது பெறப்பட்ட மாதிரிகளிலிருந்து திசு மாதிரிகளைப் பயன்படுத்தி இதனைக் கண்டுபிடித்துள்ளனர்.

“தாய்வழி பரம்பரை வழியாக அனுப்பப்படும் டி.என்.ஏ இடையேயான ஒப்பீடுகளின் அடிப்படையில் இனங்கள் இடையேயான தொடர்பை நாங்கள் மதிப்பிட்டோம்” என்று டட்ஜியன் கூறுகிறார்.

இந்த புதிய விலங்குகளின் டி.என்.ஏ தற்போதுள்ள ஹெமிசிலியம் இனங்களுடன் ஒத்துப்போகும் என்று முடிவுகள் உறுதிப்படுத்தியுள்ளன. அவை சுமார் 66 முதல் 100 மில்லியன் ஆண்டுகளுக்கு முன்புள்ள கிரெட்டேசியஸ் கால விலங்குகளின் டி.என்.ஏக்களுடன் ஒத்துள்ளது.

“சுறாக்கள் அவற்றின் அசல் தொகையிலிருந்து விலகி, புதிய பகுதிகளில் மரபணு ரீதியாக தனிமைப்படுத்தப்பட்டு, புதிய உயிரினங்களாக வளர்ந்தே இந்த புதிய இனங்கள் உருவாகியுள்ளன என்று தரவு தெரிவிக்கிறது” என்று டட்ஜியன் கூறுகிறார்.

“அவை நீச்சல் அல்லது துடுப்புகளின் மூலம் நடந்து வேறு இடங்களுக்கு நகர்ந்திருக்கலாம் அல்லது சுமார் 2 மில்லியன் ஆண்டுகளுக்கு முன்பு, நியூ கினியாவிற்கு அருகில் மேற்கு நோக்கி நகரும் கடற்பாறைகள் நகரும்போது அதனுடன் சவாரி செய்திருக்கலாம்” என யூகிக்கப்படுகிறது.

உலகில், நடக்கும் சுறா இனங்கள் இன்னும் இருக்கக்கூடும் என்று ஆராய்ச்சிக் குழு கூறுகிறது.